मेरी कविता 'बाज़ार' का नेपाल के क्रांतिकारी वाम एक्टिविस्ट और कवि बलराम तिमलसिना द्वारा किया गया नेपाली अनुवाद :

बजार !
**

बजार हामीलाई
मृत्यु, युद्ध, अभाव,
भोकमरी, र संगीनको छायाँमुनि
खुसी रहन आदेश दिन्छ

बजार हामीलाई
खुसीहरू किन्न उक्साउँछ

बजार हामीलाई
एउटा उध्दारकर्ताको भेषमा
हाम्रो जिन्दगीको अँध्यारोबाट
बाहिर निकालिदिने भरोसा वाँड्छ
हल्लाखल्ला र झिलिमिली उज्यालोतिर
हामीलाई बोलाउँछ ।

हाम्रो रुची हामीलाई सुनाउँछ बजार
र भन्छ-
हरेक कुरा किन्न र बेच्न सकिन्छ I

हामी असाध्यै चम्किला र जादुमय
चिजहरू किन्छौं
ती चिजसँगै घरमा आइपुग्छन् -
लालच, हिंसा, स्वार्थीपन, ईर्ष्या, प्रतिस्पर्द्धा
र मानसिक र शारीरिक रोगका थुप्रा ।

केही मान्छे बजारमा आफ्नो सिप बेच्छन्
कसैले काम गर्ने क्षमता
कसैले आफ्ना जरुरी चिज
कसैले आफ्नो स्मृति, सपना र कल्पना
र केहीले आफ्नो आत्मा I

बजार कवि-कलाकार-शिल्पीहरूलाई
पुरस्कृत गर्छ,
बजार समाज-सेवीहरूलाई
समाज-सेवाको लागि
मुठ्ठी खोलेर मद्दत गर्छ
र यसरी
बजार बिस्तारको नयाँ संभावनासँगै
एउटा मानवीय अनुहार हासिल गर्छ ।

बजार आफ्नो जादुको बलले
जे चिज जहाँ पनि बेच्न सक्छ
जस्तो कि-
कुकुर मेलामा कला
सुगुर मेलामा समाज-सेवा
र गोरुको हाटमा बुद्धिमत्ता !

बजारलाई देखाउँनु पर्ने छ
मानवताको भविष्य
र मुक्तिका सारा संभावनाहरू
उसैको चौघेराभित्र छिपेका छन्

तव ऊ पूँजीको वेश्यालाई
समाजवादको कपडा लगाइदिएर
मधु-याम मनाउँन थाल्छ ।

हरेक झिलिमिली बजार पछाडि
नीम उजालोले भरिएको
गहन अँधेरो फैलिएको हुन्छ
जहाँ
बजारमा आफ्नो हाड र रगत बेचेर
फर्किएको गुलाम आश्रय लिइरहेको हुन्छ
जहाँ नदीहरू सुकिरहेका हुन्छन्,
जमीनमुनिको पानीमा विष घोलिएको हुन्छ
हिमखण्ड घटिरहेका हुन्छन्
पशु-पंक्षीहरूका अगणित प्रजातिहरू
लोप भैरहेका हुन्छन्
जङ्गल काटिदै गरेको हुन्छ
खेत वाँझै हुन थाल्छन्

-कविता कृष्णपल्लवी
(17 दिसंबर, 2018)

************


'तानाशाह का नया फ़रमान' कविता का नेपाल के क्रांतिकारी वाम एक्टिविस्ट और कवि का. बलराम तिमलसिना द्वारा किया गया नेपाली अनुवाद :

तानाशाहको नयाँ आदेश
*********

तानाशाहले तय गरेको छ कि-
ऊ अब आफ्ना जनता आफै छान्ने छ !

तानाशाह चाँहन्छ
केवल झुकेका नजर
र कुप्रिएका पिठ्युँ भएका मानिस मात्र
उसको जयकार गर्दै बसुन देशमा !

तानाशाहले आफ्ना लेखनदासहरूलाई
सारा जनताको
यस्तो बही खाता तयार गर्न भनेको छ
जसबाट उनीहरूको
दैनिक हाजिरी लिन सकियोस ।

तानाशाह आदेश दिन्छ कि-
जसको वफादारी संदिग्ध छ
जहाजमा राखेर समुद्रमा छोडियोस
या नजरवन्दी शिविरहरूमा हालियोस !

तानाशाह आसपासका देशहरूबाट
वफादार जनताको आयातको लागि
आदेश जारी गर्छ !

अत्तालिएका मान्छे
जव वाध्य भएर सडकमा निस्कन्छन
तानाशाह देशको रक्षाको लागि
जनताका विरुध्द
युद्धको घोषणा गरिदिन्छ !

आवाजलाई कुल्चिसकेपछि तानाशाह
मान्छेको मौनतासँग डराउँछ !

मान्छेको मौनतामा
उसले आफ्नो मृत्युको
प्रतिध्वनि सुन्न थाल्छ !

तानाशाह
कतै त्यसले सपना देखेको त छैन भनेर
सुतिरहेको बच्चासँग पनि शङ्का गर्छ
ऊ त्यस बच्चाको सपनाको जासूसीको लागि
बच्चाको निद्रासम्म पुग्न चाहन्छ !

तानाशाहको सपनामा सँधै
सल्याङ मल्याङ गर्दै
एउटा अपरिचित चिहान आउँछ
जहाँ आफ्नो चिहानबाट उठेर
इतिहासका तमाम तानाशाह
उसको नजिक आउँछन्
मायाँले उसको पिठ्युँ मुसार्छन्
र भन्छन् कि -
उनीहरूले पनि
जो ऊ गरिरहेको छ
उसैको जसरी सोचेका
र त्यस्तै गरेका थिए !

(21दिसंबर'2019)
~ Kavita Krishnapallavi